monumenta.ch > Hieronymus > sectio 13 > uwbM.p.th.f.68.260 > uwbM.p.th.q.1a.11 > csg68.404 > sectio 13 > tblHarleyMS1775.19v > sectio 5 > csg75.840 > bnfGrec107.999 > sectio 18 > uwbM.p.th.f.12.72 > bnf17226.139 > csg48.256 > 106 > 334 > sectio 4

Word Selection for Searching

Report an Error in this Sectio
Augustinus, Sermones, 31, 195, 4
Nescit interea Ioseph Mariae sponsus, quid cum ea egerit angelus. Subito Ioseph intuitu familiari et licentia maritali aspicit Mariam coniugem suam: vidit in ea tumescentes venas in gutture, et attenuari faciem, postremum vidit eam gressibus gravari; intellexit Mariae uterum gravidari. Turbatur Ioseph homo iustus, quod Mariam quam de templo Domini acceperat, et nondum cognoverat, gravidam sentiebat , et quam non meruerat in coniugii honore, iam haberet in confusione; secumque diu aestuans ac disputans, dicit: Unde hoc contigit? quid evenit? Non cognovi, non tetigi; si non tetigi, non violavi; si non violavi, non gravidavi. Heu! heu! quid contigit? quid, putas, evenit? per quem Maria sic cecidit? quem sibi plus quam me adulantem invenit? ego enim cum licentiam haberem maritalem, ante thorum nuptiarum puellarem non vexavi pudorem. Timui, multumque pertimui, quod in illo Mosaico libro Legis sententiali est verbo praefixum: quod quaecumque virgo paternam domum foedaverit adulterio, morienda lapidibus subiacebit: similiter et vir qui pudoris vestimentum patri non detulerit, coramque testibus replicaverit, pudorisque signaculum non demonstraverit, moriendum et ipsi cum virgine erit. Utrosque ergo libidinarios hac Moyses sententia feriri voluit, simulque adulteros perire mandavit. Sic namque ait: Auferetis opprobium de domo Israel; et omnis qui audierit, timebit, et non aget impie . Hanc Moysi sententiam praecavebam, ipsamque luxuriam in meo corpore refrenabam, maxime quia et David filiam esse, et regali me functum sacerdotio praenoscebam . Sed quoniam nihil mirum est, nihil novum, nihil absconsum quod non reveletur, et occultum quod non in publicum veniat, in David regis filia aliquando recolo historiam. David regem in Bersabee Uriae Cethaei mulierem audacia extulit regalis, nec eum timor terruit maritalis: Mariam David regis filiam cogitatio impulit puellaris, nec eam tenuit terror parentalis. Quid ergo faciam? quid agam? Anxior, gemo, doleo, curro, consilium quaero, nec plenum invenio. Prodo, aut taceo? Quid faciam penitus nescio. Prodo adulterium, aut taceo propter opprobrium? Si prodidero, adulterium quidem non consentio, sed naevum crudelitatis incurro; quia secundum librum Moysi lapidandam esse cognosco. Si tacuero, malum consentio; et cum adulteris portionem meam pono. Quoniam ergo tacere malum est, adulterium prodere peius est; ne per me fiat homicidium, dimittam tacite coniugium. Cogitavit, inquit, Ioseph, sicut Evangelium dicit, occulte dimittere Mariam coniugem suam . Cogitavit ut esset alterius, cum iam esset alterius , non mentis refragatione, sed fidei conceptione.